Seminario Europa: «Eleccións Europeas 2024: A Eurocámara e a súa Administración parlamentaria» con David Rodríguez Guillén

O mércores, 15 de maio, ás 19.30h o Ateneo de Santiago e a Asociación Federalista de Galicia organizan no Salón de Actos Isaac Díaz Pardo do Ateneo de Santiago, situado na Praza de Salvador Parga, 4-2º, de Santiago de Compostela, unha conversa con David Rodríguez Guillén, Doutor en Comunicación pola Universidad Autónoma de Barcelona e responsable das relacións da Eurocámara cos Parlamentos Nacionais. O acto, que estará presentado por Cristina Ares Castro-Conde, Profesora de Política da Unión Europea da USC, centrarase no tema «Eleccións Europeas 2024: A Eurocámara e a súa Administración parlamentaria».

David Rodríguez Guillén é Doutor en Comunicación pola Universidade Autónoma de Barcelona, cunha tese sobre a política de comunicación da Unión Europea. Cursou o máster de estudos europeos no Colexio de Europa de Bruxas. É Licenciado en Ciencias Políticas e da Administración pola Universidade de Murcia. Dende o ano 2011, desenvolve a súa actividade profesional nas institucións da Unión Europea: primeiro, na Comisión Europea, na Dirección Xeral de Transporte e Enerxía; e, a continuación, dende 2015, ocupou diversas posicións no seo do Parlamento. Na actualidade, serve na Dirección Xeral de Democracia Parlamentaria, como responsable de expedientes relativos ás relacións da Eurocámara cos Parlamentos Nacionais.