Conferencia «Descifrando como corrompe o cancro os tecidos para deseñar novos tratamentos» de Fernando Calvo

O luns, 13 de novembro, ás 19.30h o Ateneo de Santiago, ten programada na Rúa do Vilar, 19, de Santiago de Compostela unha conferencia titulada «Descifrando como corrompe o cancro os tecidos para deseñar novos tratamentos», que estará impartida por Fernando Calvo, investigador principal no Instituto de Biomedicina e Biotecnoloxía de Cantabria (IBBTEC).

A pesar dos grandes avances no coñecemento do cancro, que derivaron en tratamentos máis eficaces e personalizados, desgraciadamente existen aínda moitos pacientes para os que non existe tratamento ou para os cales os tratamentos existentes non funcionan. Para descubrir as razóns a estas respostas dispares, é crítico entender cales son as características clave que determinan o éxito de cada tratamento e idear estratexias para poder modulalas segundo o paciente. En gran parte, ditas respostas van depender do tipo de cancro específico e das súas características xenéticas intrínsecas. Pero estes aspectos non son capaces de explicar as respostas dos pacientes na súa totalidade. Avances recentes no campo destacaron a grande importancia que ten a composición e organización das distintas compoñentes que forman un tumor na resposta final aos tratamentos, o cal abriu un campo de posibilidades, tanto a nivel de diagnóstico como de tratamento. Nesta charla presentaranse en detalle estes avances e desafíos, ademais de como o equipo de Fernando Calvo pretende afrontalos coas súas investigacións centradas no microambiente tumoral e nun tipo concreto de compoñente: os fibroblastos asociados a cancro. 

Fernando Calvo González é investigador principal no Instituto de Biomedicina e Biotecnoloxía de Cantabria (IBBTEC). A súa investigación céntrase en desentrañar os mecanismos que regulan o desenvolvemento do cancro co fin de mellorar o entendemento da enfermidade e informar o desenvolvemento de novos tratamentos. Orixinario de Santander, realizou a súa Tese Doutoral con Piero Crespo na Universidade de Cantabria, estudando o oncoxén Ras. Continuou os seus estudos no London Research Institute (Reino Unido) investigando o papel do microambiente tumoral (as células que forman parte dun tumor pero que non son células canceríxenas) na progresión e diseminación tumoral. O seu traballo permitiu describir por primeira vez como as propiedades físicas dos tumores alteran o comportamento de células normais promovendo o crecemento tumoral e a metástase. En 2014 estableceu o seu propio laboratorio no Institute of Cancer Research (Reino Unido), continuando os seus estudos en metástases, microambiente tumoral e fibroblastos-asociados a cancro (CAFs). En 2018, obtivo un contrato Ramón y Cajal e uniuse ao IBBTEC, onde obtivo praza de Científico Titular CSIC en 2021. Na actualidade dirixe un equipo multidisciplinar de biólogos, químicos e matemáticos aos que unen colaboracións con clínicos e enxeñeiros. O seu traballo derivou na produción de 40 publicacións en prestixiosas revistas internacionais. Ademais, dirixiu proxectos competitivos entre os que destacan as prestixiosas axudas ERC Consolidator Grant, Worldwide Cancer Research, CRUK Collaborative Award, Lab-AECC e Proyectos Coordinados AECC. Actúa habitualmente como avaliador para institucións científicas nacionais e internacionais, e como editor e revisor en múltiples revistas científicas. Foi convidado a impartir máis de 40 charlas e seminarios en congresos, universidades e outras institucións científicas, nacionais e internacionais.