O Cineclub Ateneo continúa o ciclo dedicado a Aki Kaurismäki con «A rapaza da fábrica de mistos»

O Ateneo de Santiago celebrará o vindeiro martes, 26 de maio, unha nova sesión do Cineclub Ateneo coa proxección da película A rapaza da fábrica de mistos (Tulitikkutehtaan tyttö [The Match Factory Girl]), incluída no ciclo «O cinema de Aki Kaurismäki». A actividade terá lugar ás 19.00 horas no Salón de Actos Isaac Díaz Pardo do Ateneo (Praza de Salvador Parga, 4-2º) e contará coa presentación e comentario de Rosa Rodríguez Porto, profesora de Historia da Arte da Universidade de Santiago de Compostela.

Dirixida por Aki Kaurismäki en 1990, a película segue a historia dunha moza que desenvolve un traballo repetitivo nunha fábrica de mistos e que leva unha vida marcada pola soidade, a ausencia de afecto e a incomprensión no ámbito familiar. Nunha procura de escapar desa realidade, intenta atopar nas súas saídas nocturnas unha vía de evasión e unha oportunidade para mudar o seu destino. Co estilo austero e característico do cineasta finlandés, a obra aborda cuestións como a alienación, a marxinación social e a vulnerabilidade emocional.

A rapaza da fábrica de mistos constitúe a terceira e derradeira entrega da coñecida «Triloxía do proletariado», iniciada con Sombras no paraíso e continuada con Ariel. O ciclo organizado polo Cineclub Ateneo permite achegarse á filmografía dun dos directores europeos máis recoñecidos das últimas décadas, caracterizado por un cinema de forte carga humana, minimalista e profundamente atento ás vidas cotiás dos sectores máis desfavorecidos.

Ver en Diario de Santiago