O Ateneo Barroco poñerá o foco en instrumentos pouco coñecidos

O Ateneo Barroco xa ten cartel para a súa oitava edición, que se desenvolverá entre o 6 e o 20 de outubro en distintos espazos da cidade. Nesta ocasión, dálle continuidade ao proxecto bianual iniciado no 2025 centrado no papel dos instrumentos na música antiga e barroca. Deste xeito, achegará instrumentos pouco habituais nos concertos actuais, como o quintón, o colascione, a arpa italiana de tres rexistros, a viola de roda, a zanfona, o fagot barroco, o clavecín ou a familia das violas da gamba.

O festival sumará seis concertos. Comezará con Lina Tur Bonet, que presentará o día 6 de outubro na Igrexa da Universidade «Bach, partita, sonata. O violín do gran mestre», un programa dedicado ás sonatas e partitas para violín só de Johann Sebastian Bach. Ao día seguinte, será a quenda de coñecer a proposta encargada polo festival a Ars Atlántica, con Manuel Vilas á dirección e á arpa italiana de tres rexistros. Estará acompañado pola soprano portuguesa Raquel Mendes. A peza «A nova música. O nacemento da ópera» soará no Teatro Principal ás 20 horas.

O 9, tamén no Principal, Resonet presentará en primicia «Los alegres días de Nápoles», proxecto liderado por Mercedes Hernández e Fernando Reyes tras un longo período de investigación. O programa terá como eixo a música nos tempos de Pedro Fernández de Castro, vicerrei de Nápoles e sétimo conde de Lemos.

O festival organizado polo Ateneo de Santiago seguirá o día 13, no Salón Teatro, con Arc & Volta, o proxecto de Xurxo Romaní e Anna Casademunt. O venres 16, no Paraninfo da Universidade, actuará o clavecinista francés Bertrand Cuiller. Trátase da primeira actuación en Galicia do músico. A clausura do festival será o día 20 no Salón Teatro con Accademia del Piacere e Fahmi Alqhai.

A programación foi presentada onte polo presidente do Ateneo, Francisco Candela; o director do festival, Víctor Carou; e o director da Agadic, Jacobo Sutil. Nela destacaron a presenza de artistas galegos en diálogo con figuras de prestixio internacional. Os abonos (35 euros) e entradas individuais saen hoxe á venda.

Ver en La Voz de Galicia