Gonzalo Navaza falará sobre toponimia galega nos Luns do Ateneo

O Ateneo de Santiago acollerá o vindeiro luns, 10 de xuño, unha conferencia impartida polo membro da Real Academia GalegaGonzalo Navaza, titulada ‘Toponimia: razón de ser e de estar‘. O acto terá lugar ás 19:30 na sede de Afunción na rúa do Vilar e será de acceso libre ata completar a capacidade da sala.

Gonzalo Navaza, recoñecido filólogo e investigador no campo da onomástica, centrará a súa exposición na riqueza da toponimia de Galicia, que contén un terzo das entidades de poboación de toda España. Con todo, o conferenciante alertará sobre a situación dos microtopónimos, dos cales existen arredor de 2 millóns en Galicia, moitos dos cales están en risco de desaparecer. Durante a conferencia, compartirá tamén as iniciativas actuais para preservar este valioso patrimonio cultural.

Navaza é unha figura destacada neste campo, coñecido polas súas contribucións á toponimia desde os anos 80, cando traballou na recollida de campo e corrección da toponimia dos mapas do Instituto Xeográfico Nacional para as provincias de Pontevedra e Ourense. Como membro activo da Comisión de Toponimia da Xunta de Galicia e expresidente da Asociación Galega de Onomástica, a súa experiencia e coñecemento son un recurso inestimable para a comunidade interesada na conservación do patrimonio lingüístico de Galicia.

Ver en Xornal de Compostela