Darío Villanueva falará de Rodríguez Cadarso nos Luns do Ateneo

Santiago. O próximo luns 3 de febreiro, Darío Villanueva, Catedrático de Teoría da Literatura e Literatura Comparada e exreitor da USC, impartirá unha conferencia sobre a figura de Rodríguez Cadarso, reitor da Universidade de Santiago entre 1931 e 1933, ano do seu pasamento. O acto, que terá lugar como todos os luns ás 20.00 h na Rúa do Vilar, 19, estará presentado polo tamén ex-reitor Juan Casares, catedrático de Enxeñaría Química da USC. Villanueva achegaranos á figura de Alejandro Rodríguez Cadarso, médico e político de Noia, que exerceu como reitor da Universidade compostelá na Segunda República. Durante o seu mandato inauguráronse as residencias universitarias, das cales unha leva o seu nome. Foi ademais fundador do Instituto de Estudos Portugueses e deputado das Cortes pola ORGA (Organización Republicana Galega Autónoma), caracterizándose polo seu apoio á autonomía galega. O seu temperán falecemento en accidente de tráfico truncou o seu ingreso na Real Academia Galega, para o que estaba preparando o discurso.

Darío Villanueva, licenciado en Filoloxía Románica pola USC e doutor en Filoloxía Hispánica pola Universidade Autónoma de Madrid, foi decano da Facultade de Filoloxía compostelá, Doutor Honoris Causa por doce universidades de numerosos países e Reitor da USC entre 1994 e 2002. Ademais, entre 2014 e 2018 foi director da Real Academia Española e é presidente nato da Asociación de Academias da Lingua Española.

Ver en El Correo Gallego