Presentación da banda deseñada «A morte nas fragas» e do documentario «Os fíos da memoria»

O mércores, 11 de marzo, ás 19.00h, o Ateneo de Santiago ten programado no Salón de Actos Isaac Díaz Pardo (Praza de Salvador Parga, 4-2º), un acto sobre memoria histórica democrática, no que se presentará a banda deseñada «A morte nas fragas» e o documentario «Os fíos da memoria». No acto participarán:
          Anxos García Fonte, guionista de «A morte nas fragas»
          Carlos Sardiña, debuxante de «A morte nas fragas»
          Henrique Sanfiz, Licenciado en Xeografia e Historia pola USC
          Xosé Ramón Pousa, Directivo do Ateneo de Santiago

A MORTE NAS FRAGAS
Con guión de Anxos García Fonte e debuxos de Carlos Sardiña, é unha novela gráfica que narra a historia de violencia e resistencia na Galicia rural entre 1936 e finais da década de 1950. A obra artéllase a través de varias historias humanas entrelazadas, baseadas en relatos de transmisión oral , que amosan o impacto da represión fascista na vida cotiá do pobo. A narración adopta unha perspectiva múltiple, dando voz a nenos, mulleres e persoas perseguidas polo réxime. Un trazo distintivo da obra é a mestura da realidade histórica coa mitoloxía tradicional galega; os seres do submundo (“a mourindade”) interactúan cos personaxes e asisten á decadencia da súa cultura ancestral fronte á explotación capitalista dos recursos naturais. O relato ten o seu corazón xeográfico nas Fragas do Eume. Visualmente, é un traballo onde as imaxes a miúdo superan ás palabras, e os escasos diálogos reflicten fielmente as fontes orais que o inspiraron. A novela preséntase como un mosaico que reflicte a destrución da Galicia tradicional: as súas crenzas, a vida comunitaria e a lingua. É un retrato da traizón e o desastre ecolóxico, mais tamén unha lección de resistencia e un canto de esperanza.

OS FÍOS DA MEMORIA
Producida por Son Radiofusión e realizada por Xarda Producións, esta curtametraxe (27 minutos) narra a investigación de Constantino Rico, un cidadán francés de orixe galega, para desvelar o misterio que sempre envolveu a historia do seu avó, Pedro Rico Rodeiro, e Teresa López para coñecer as circunstancias do seu tío Constantino López Marcos. A súa busca en arquivos e cemiterios acaba dando froitos grazas a unha testemuña atopada a través dun podcast, desvelando a crúa realidade da Guerra Civil e a posguerra na súa familia.

Anxos García Fonte, Doutora en Filoloxía galego-portuguesa, traballou como xornalista cultural e crítica literaria en diversos medios como Xornal de Galicia, Sermos Galicia, Radio Fene ou o Consello da Cultura Galega. En 2022 estreou a curtametraxe A rosa incandescente, da que é guionista e produtora.

Carlos Sardiña, formado como deseñador gráfico e ilustrador, é o fundador da web de ilustracións personalizadas telodibujamos.com. É colaborador asiduo da editorial Son Radiofusión, ilustrando libros como Galicia acorda, Bóveda ou María Casares, eu son o océano.

Henrique Sanfiz dirixe dende 1985 Radio Fene, emisora municipal do Concello de Fene, e coordina Radiofusión, a programación conxunta que se realiza dende Fene para as Emisoras Municipais Galegas. Licenciado en Xeografía e Historia pola Universidade de Santiago de Compostela (1985), participou na fundación da asociación Emisoras Municipais Galegas e ocupa dende 1989 a secretaría desta entidade. Presentou ponencias en numerosos encontros e xornadas sobre a comunicación local e é autor de varios libros e comunicacións.