Seminario Europa: «A construción da Europa xeopolítica nunha nova orde internacional» con Ruth Ferrero

O xoves, 17 de outubro, ás 19.30h o Ateneo de Santiago e a Asociación Federalista de Galicia organizan no Salón de Actos Isaac Díaz Pardo do Ateneo de Santiago, situado na Praza de Salvador Parga, 4-2º, de Santiago de Compostela, unha conversa con Ruth Ferrero, Profesora de Ciencia Política e Estudos Europeos na Universidade Complutense de Madrid. O acto, que estará presentado por Cristina Ares Castro-Conde, Profesora de Política da Unión Europea da USC, centrarase no tema «A construción da Europa xeopolítica nunha nova orde internacional».

Ruth Ferrero-Turrión é Profesora de Ciencia Política e Estudos Europeos na UCM e Investigadora Adscrita no Instituto Complutense de Estudos Internacionais na Universidade Complutense (ICEI-UCM), onde dirixe os Diplomas «Migracións e Relacións Internacionais», «As políticas de inmigración e asilo da UE» e «Novos Escenarios nos Balcáns». Forma parte do Grupo de Investigación Complutense GEMI de Migracións Internacionais e foi Premio Europeo de Investigación Carlos V 2019 pola Fundación Europea e Iberoamericana de Yuste e Non-Visegrad Fellow de V4 Think Tank Platform en 2018. Ademais das súas tarefas como profesora, desenvolve o seu traballo profesional como consultora con institucións e organizacións como FIIAP, European Training Foundation, Migration Policy Group, Migration Policy Institute, Instrategies e OIM, entre outros. Foi Research Fellow na Universidade de Columbia (NYC), en London School of Economics (LSE), Babes-Bolyai University (Romania), Hungarian Institute of International Relations e Open Society Foundation de Sofía e Senior Fellow do Institute of International Relations (IIR) de Praga. Tamén foi Profesora Visitante nas Universidades de Bochum (Alemaña), Coimbra (Portugal) e Varsovia (Polonia). Ten traballado en labores de asesoría política no marco da Administración Xeral do Estado, no Gabinete do Ministro de Traballo e Asuntos Sociais (2004-2006) e no Gabinete do Presidente do Goberno (2006-2011). En ambos os dous postos realizou funcións relacionadas con políticas migratorias e políticas europeas sectoriais. Colabora como analista de política internacional e europea en El Periódico, así como con outros medios de comunicación, como Esglobal, www.ctxt.es, Política Exterior e La Noche en 24h, e en think tanks nacionais (Real Instituto Elcano, Fundación Alternativas) e internacionais (Migration Policy Institute, Institute of International Relations Prague).