Presentación do libro «Bailando con moscas» de Antonio Fontdevila

O mércores, 24 de abril, ás 19.30h, o Ateneo de Santiago ten programada na Rúa do Vilar, 19, de Santiago de Compostela, a presentación do libro «Bailando con moscas» de Antonio Fontdevila. O autor estará acompañado por Ángel Carracedo, Catedrático de Medicina Legal e experto internacional en xenética, e Xerardo Estévez, ex-Alcalde de Santiago de Compostela.

Bailando con moscas busca transmitir ao lector as vivencias científicas do autor, a súa aproximación á xenética evolutiva e os aspectos ecosociais cos que se atopou nas súas expedicións, compartindo tamén as súas ideas sobre como se fai ciencia en contornos socioculturais diversos. A comprensión do valor da ciencia básica para o desenvolvemento aínda non está arraigada no noso país, nin moito menos o papel clave que organismos modelo, mal considerados insignificantes, como as moscas Drosophila, xogan nas grandes descubertas científicas. Este libro trata de rebatir esta idea xeralizada e resalta a importancia que o pensamento evolutivo, froito da revolución impulsada por Charles Darwin, ten para entender a vida neste planeta. 

Antonio Fontvila, Catedrático emérito na Universidade Autónoma de Barcelona, é investigador principal en máis de vinte proxectos financiados por axencias nacionais e internacionais e director de dezaoito teses doutorais, ademais de autor de doce capítulos de libros e numerosas publicacións científicas, a maioría en revistas de alto impacto como Nature, Genetics ou Molecular Biology, así como editor dunha obra e autor de catro libros, entre eles The Dynamic Genome: A Darwinian Approach (Oxford University Press, 2011), que foi adoptado como libro de referencia en diversos másteres de bioloxía e xenética en universidades nacionais e estranxeiras. Foi nomeado membro do consello da Society for the Study of Evolution (EEUU, 1986) e elixido Vicepresidente da Sociedade Española de Xenética (1985-1989), ademais de ser membro fundador e socio honorario da Sociedade Española de Bioloxía Evolutiva.