QUATUORS. A escena de Rameau en cuarteto (LA REVERENCIA)

QUATUORS
A escena de Rameau en cuarteto
LA REVERENCIA
ANDRÉS ALBERTO GÓMEZ  clave / dirección
PAVEL AMILCAR  violín
JOSÉ FERNÁNDEZ VERA  frauta travesa
SARA RUIZ  viola da gamba
Igrexa da Universidade
Martes 10 outubro 2023
20.00h

Andrés Alberto Gómez e o seu conxunto La Reverencia levan anos realizando un monumental proxecto dirixido especificamente á obra de Jean-Philippe Rameau, un inxente traballo que comezou coa gravación das Pezas de clavecín en concerto, disco que recibiu numerosos premios da crítica, inclúe a primeira tradución ao español dun valiosísimo texto de referencia sobre o compositor e cuxo último froito é Quatuors (Cuartetos), programa aínda inédito e que se estrea no Festival Ateneo Barroco 2023. Quatuors inclúe un material único, xa que é a primeira vez que se adapta a música operística de Rameau para a formación de cuarteto. Xa o xenial compositor francés afirmaba “o cuarteto é o que reina” no prólogo das súas Pezas de clavecín en concerto, e poucos exemplos podemos atopar máis ilustrativos da importancia do intérprete na recreación de novas visións no mundo da música antiga e barroca que estes cinco cuartetos conformados por momentos moi escollidos de entre doce das óperas de Rameau e que nos brindan a oportunidade de achegarnos ao seu singular espírito escénico e teatral a través da música de cámara.

PROGRAMA

QUATUORS
Jean-Philippe Rameau (1683-1764)

PREMIER QUARTET
Ritournelle
Air pour les Bergères
Ritournelle
Sarabande
Chacone

SECOND QUARTET
Prelude 
Menuet
Tambourin
La Chasse
Entrée de Polymnie
Gavotte
Air Gai en rondeau

TROISIÈME QUARTET
Ritournelle
Menuet
Viens Hymen
Air Gai
Symphonie
Air tender
Gavottes

QUATRIÈME QUARTET
Quatour
Air Majestueux
Air des Musettes
Tambourin

CINQUIÈME QUARTET
Ouverture
Sarabande
Sous les drapeaux de Mars
Gavotte
Chaconne

LA REVERENCIA
Dende a súa creación, La Reverencia vén traballando no eido da interpretación musical con criterios históricos. Os seus compoñentes son profesionais que contan cunha dilatada carreira artística de traxectoria internacional. As súas actuacións son aplaudidas unanimemente por crítica e público, estando presentes en importantes ciclos e festivais como o Festival Internacional de Santander, FEMÀS de Sevilla, Arte Sacro de Madrid, Festival Pórtico do Paraíso, Festival de Daroca, Festival de Música Antiga de Xixón ou Festival de Música Antiga de Cagliari. Nos últimos anos La Reverencia vén dedicando unha atención especial á música francesa con programas centrados en Jean-Philippe Rameau. En 2013 gravaron De Occulta Philosophia, película-documental dirixida por Daniel Villamediana que foi seleccionada en numerosos festivais internacionais entre os que cómpre salientar Bos Aires (BAFICI 2013), Marsella (FID Marseille 2013) e Sevilla (SEFF 2013). A súa discografía ten sido acollida sempre con numerosas louvanzas e en 2011 crearon o seu propio selo discográfico, Vanitas, a través do cal presentan os seus proxectos.

ANDRÉS ALBERTO GÓMEZ
Tras os inicios musicais en Albacete con Arturo Moya e Jesús Mª. Díaz Valenciano, iníciase no clave cos profesores do Conservatorio Italiano de París Salvo Romeo e Patricio Pizarro, ampliando a súa formación con músicos como Jan Willen Jansen, Tony Millán, Yves Rechsteiner ou Huguette Dreyfuss. Rematou os seus estudos de clave e música antiga no Real Conservatorio da Haia (Holanda) como alumno de Jacques Ogg e na Escola Superior de Música de Cataluña ESMUC como alumno de Béatrice Martin, obtendo matrícula de honra e felicitación do xurado. En 2002 foi finalista do concurso de Xuventudes Musicais. Realizou gravacións para a Radio Holandesa, a Radiotelevisión Eslovena, WDR 3, Radio Cataluña, a Radiotelevisión Polaca e os selos Arsis, Passacaille, Dynamic, Tañidos e Vanitas. É fundador e director do ensemble La Reverencia. Actuou como solista e continuísta en España, Italia, Francia, Bélxica, Suíza, Holanda, Noruega, Grecia, Alemaña, Eslovenia, Polonia e Lituania, e xunto a conxuntos como Les Arts Florissants, Canto Coronato, La Guirlande, Armonía del Parnàs, Orquestra Barroca do Conservatorio da Haia ou a Orquestra Sinfónica de Oviedo, sendo dirixido por músicos como William Christie, Paul Dombrecht, Paul McCreesh, Roy Goodman, Richard Egarr ou Ton Koopman. É colaborador habitual dos grupos Tasto Solo, La Fura dels Baus e Divina Mysteria. En 2013 gravou, xunto con La Reverencia, De Occulta Philosophia, película-documental que xira arredor da música barroca e que foi seleccionada en numerosos festivais, entre os que cómpre salientar Bos Aires (BAFICI 2013), Marsella (FID Marseille 2013) e Sevilla (SEFF 2013). A súa discografía ten recibido as mellores críticas por parte da prensa especializada e en 2011 creou xunto a La Reverencia o seu propio selo discográfico, Vanitas, a través do cal presenta os seus proxectos. As súas gravacións son distribuídas internacionalmente por New Arts International e están presentes en toda Europa, América e Xapón. Entre a súa discografía cómpre salientar as Variacións Goldberg de Bach, que recibiron recoñecementos como 5 Muses (Muse Baroque), Disco Excepcional (Scherzo), 5 Diapasones (Diapason) e é a primeira versión das Variacións Goldberg gravada por un clavecinista español.