Presentación do libro «O moucho voa. Filosofía en 25 conversas» de Miguel Vázquez Freire

O mércores, 31 de maio, ás 19.30h, terá lugar na Rúa do Vilar, 19, de Santiago de Compostela, a presentación do libro «O moucho voa. Filosofía en 25 conversas» de Miguel Vázquez Freire. Ademais do autor, no acto participarán Eva Garea Traba, profesora de filosofía no IES Xelmírez I e membro do grupo Nexos de Didáctica da Filosofía, e Xosé Gándara, membro do Ateneo de Santiago.

O moucho voa. Filosofía en 25 conversas é un libro pensado para introducir á mocidade na filosofía. Está constituído por 25 conversas, amenas e desenfadadas, organizadas nos catro temas principais dos que se ocupa a filosofía tradicionalmente: o Ser, a Verdade, o Ben e a Xustiza. 

Miguel Vázquez Freire, nado en Corcubión, é colaborador como crítico de literatura infantil en numerosas publicacións. Foi director da revista infantil «Golfiño» e codirector da colección Merlín de Xerais, ademais de coautor dos materiais educativos de Filosofía de Xerais como membro do grupo de Didáctica da Filosofía Enxergo e promotor de Pé de Imaxe e de Nova Escola Galega. Como especialista en didáctica da filosofía publicou «Nietzsche», «Iniciación á Estética», «Política e Sociedade», «Mandar, obedecer, rebelarse» e «O moucho voa», ademais de realizar a tradución para o galego da obra de R. Descartes «O discurso do método». A súa obra está traducida a todas as linguas peninsulares.