Debate sobre «La muerte del padre» de Karl Ove Knausgård

Os días 21 e 28 de marzo e 11 e 18 de abril, ás 17.45h no local social do Ateneo de Santiago (Pr. Salvador Parga, 4, 2º) terán lugar novas sesións do Club de Lectura, onde se comentará a obra La muerte del padre, de Karl Ove Knausgård.

La muerte del padre  é a primeira novela das seis que conforman a saga literaria Mi lucha. Knausgård embárcase nunha profunda exploración na que desmenuza a historia da súa propia vida ata obter as «partículas elementais». O resultado é unha historia universal dos combates que todos debemos librar, unha novela tan profunda como absorbente, escrita coma se a propia vida do seu autor estivese en xogo.

Karl Ove Knausgård (Oslo, 1968) é un escritor de Noruega. Foi considerado o mellor escritor da zona desde o dramaturgo Henrik Ibsen. O seu estilo minuciosamente detallado comparouse co do novelista francés Marcel Proust. Publicou por primeira vez en 1998, cando se editou a súa novela Ute av verden, pola cal foi premiado co Premio á Crítica Literaria Noruega. Esta foi a primeira vez na historia que o premio foi outorgado a un debutante. Aínda que os seus dous primeiros libros foron moi ben recibidos, foi coas obras que integran a saga Mi lucha cando Knausgård obtivo un lugar de renome en Noruega, debido tanto ao seu éxito como á controversia que xeraron. Caracterízase por unha prosa lenta e precisa, que perdura cun ritmo narrativo persistente e case musical.