Conferencia «O Padre Feijóo e o Dereito do seu tempo. Unha visión premonitoria dos problemas actuais» de Luis Rodríguez Ennes

O luns, 28 de novembro, ás 19.30h o Ateneo de Santiago ten programada na Rúa do Vilar, 19, de Santiago de Compostela unha conferencia, organizada pola Sección Compostela, titulada «O Padre Feijóo e o Dereito do seu tempo. Unha visión premonitoria dos problemas actuais», que estará impartida por Luis Rodríguez Ennes, Catedrático emérito de Dereito Romano da Universidade de Vigo e ex-Secretario Xeral da USC.

Luis Rodríguez Ennes, Licenciado e Doutor en Dereito co número un do premio extraordinario pola USC, exerceu nesta Universidade os cargos de Vicedecano da Facultade de Dereito (1983-1986), Secretario Xeral (1986-1989) e Vicepresidente do Claustro Universitario (1984-1986). A continuación, na Universidade de Vigo, exerceu como Vicepresidente do Claustro Universitario Constituínte (1990-1994), asesor xurídico (1990-1993) e Decano da Facultade de Dereito (1990-2000).  Foi membro do consello rector da EGAP (Escola Galega de Administración Pública) (1990-1996), da Societé D’historie Jean Bodin (Bruselas, 1986), da Societé International des Droits de la Antiguité (Bruselas, 1981), da Asociación Española para el Estudio del Derecho Romano (Madrid, 1984) e da Asociación Internacional de Estudios Gallegos (Oxford, 1996). Tamén foi Director da revista «Lingua e Dereito» da Universidad de Vigo, ten publicadas máis de cen obras e recibiu varios premios como o Premio Manuel Colmeiro de investigación da Xunta de Galicia.