Novas
Bases do Premio de Xornalismo Cívico Alfredo Vicenti 2026
- Compartir
1º Poderán concorrer ao Premio de Xornalismo Cívico Alfredo Vicenti, que organiza o Ateneo de Santiago coa colaboración da Federación de Ateneos de Galicia, traballos de calquera xénero periodístico en calquera dos soportes tradicionais ou dixitais que contribúan a promover un debate cívico sobre asuntos de interese social, favorecendo o espazo público para mellorar a calidade de vida dos cidadáns.
2º Poderán participar no Premio as persoas físicas que sexan autoras dos traballos presentados e teñan o xornalismo como principal medio de vida ou ben sexan Graduados en Xornalismo ou Comunicación Audiovisual ou cursen un máster ou doutoramento en Xornalismo. Os traballos tamén poderán ser propostos, co consentimento do autor ou autores, polos medios nos que foron publicados ou polos/as socios/as da Federación de Ateneos de Galicia.
3º Os autores deberán estar debidamente identificados a través do formulario que se adxunta nas bases e os traballos deberán cumprir os seguintes requisitos:
- Abordar temas de interese cívico ou cidadán e estar publicados ou difundidos entre o 1 de novembro de 2025 e o 31 de outubro de 2026.
- Os traballos impresos ou publicacións dixitais deberán estar redactados en galego, preferentemente, ou en castelán.
- Os traballos audiovisuais deberán incluír narracións ou diálogos en calquera dos dous idiomas: galego ou castelán.
4º A proposta dos traballos deberá realizarse no correo electrónico ateneo@ateneodesantiago.gal, especificando no asunto o nome do premio.
5º Os traballos publicados en papel presentaranse no soporte orixinal da publicación escaneada; para traballos difundidos nun medio dixital, remitirase unha copia en pdf, indicando claramente a URL de acceso on line ao traballo; os vídeos presentaranse en formato MP4 ou AVI; as gravacións radiofónicas presentaranse en formato MP3.
En todos os casos os traballos presentados virán acompañados do formulario que se deberá cumprimentar.
6º O prazo de presentación dos traballos terminará ás 20 horas do día 31 de outubro de 2026.
7º Non poderán presentarse máis de tres traballos por autor.
8º O fallo do premio darase a coñecer o 29 de Novembro de 2026, aniversario do nacemento de Alfredo Vicenti, e, posteriormente, procederase á entrega do Premio nun acto público en Santiago de Compostela.
9º O Premio de Xornalismo Cívico Alfredo Vicenti estará dotado con 1.500 € e un recordo conmemorativo. Os finalistas comprométense a estar inescusablemente presentes no acto de entrega; de non facelo enténdese que renuncian ao premio.
10º O xurado estará presidido polo presidente do Ateneo de Santiago, ou persoa en quen delegue; un representante dunha Organización Profesional de Xornalistas; un representante da Facultade de Ciencias da Comunicación da USC; un representante da Federación de Ateneos de Galicia; e o gañador/a da última edición do premio; actuando como secretario un membro da Xunta Directiva do Ateneo de Santiago.
11º O traballo premiado pasará á disposición do Ateneo de Santiago, que poderá editalo ou divulgalo sen xerar dereitos de autor.
12º Non se premiará ningún traballo xa galardoado noutras convocatorias de premios.
13º O fallo do xurado será inapelable.
14º A participación nestes premios supón a aceptación das presentes BASES e o seu cumprimento. Estas poden ser consultadas na web: www.ateneodesantiago.gal.
